Во недела, 22 февруари, планината повторно ќе пулсира во ритам на чекори, снег и адреналин. По осми пат ќе се одржи Чупино Winter Vertical, зимска планинска трка која прерасна во вистински спортски спектакл во регионот.Трката долга 5 километри со 1000 метри искачување претставува суров тест за издржливост, карактер и волја. Стартот е во 10:00 часот од чаршијата во Блатец, а целта – симболично, на врвот Чупино, каде учесниците ја освојуваат не само планината, туку и сопствените граници.Оваа година се очекуваат 150 натпреварувачи од 8 држави, меѓу кои и дел од најсилните вертикал тркачи од регионот. Токму од Чупино ќе започне и новата сезона на Sky Running лигата, што дополнително ја потврдува важноста на настанот на меѓународната спортска мапа.Но Чупино не е само трка – тоа е атмосфера.Веднаш по пристигнувањето на првите натпреварувачи, во 11:30 часот започнува планинската забава со настап на DJ Ерик, група Флоат и The Hounds, кои ќе го претворат врвот во сцена под отворено небо.Настанот оваа година носи и силна порака – заштита на природата и поддршка за стопирање на изградбата на хидроцентралата на Блатешница, затоа што токму ваквите настани ја покажуваат вредноста на планината каква што е – дива, чиста и жива.Со храна, топли пијалоци и вистинска планинска енергија, Чупино Winter Vertical повторно ќе покаже дека спортот, природата и заедницата можат да создадат настан кој се чувствува, не само што се гледа.Чупино Winter Vertical – кога планината станува сцена, а секој чекор е победа.
Извор: Општина Виница