Македонска Каменица (Соопштенија): ЗАПОЧНУВА ПРОЕКТОТ „ЕНЕРГЕТСКО ЕФИКАСНИ ДОМОВИ“ ВО МАКЕДОНСКА КАМЕНИЦА – ПРВИОТ ПРОМОТИВЕН НАСТАН ЌЕ СЕ ОДРЖИ НА 18 ЈУНИ ОД 11:30 ЧАСОТ ВО ДОМОТ НА КУЛТУРАТА

Општина Македонска Каменица и Здружението за хумано домување „Хабитат Македонија“ потпишаа Меморандум за соработка за подобрување на енергетската ефикасност во станбениот сектор. Согласно потпишаниот Меморандум, ќе биде реализиран проектот „Енергетско ефикасни домови“, кој во првата фаза ќе ги опфати колективните објекти за домување, а веднаш по завршувањето на оваа фаза ќе се пристапи кон обезбедување финансиски средства за субвенционирање и на индивидуалните објекти за домување.

Првиот промотивен настан за реализација на овој проект ќе се одржи на 18 јуни, со почеток во 11:30 часот, во Домот на културата во Македонска Каменица. На настанот се поканети сите граѓани, претставници на куќните совети и управители на станбени згради. Комплетната постапка за реализација на проектот ќе биде претставена од градоначалничката Соња Стаменкова, претставници на општинската администрација и претставници на партнерското Здружение за хумано домување „Хабитат Македонија“.

За реализација на проектот „Енергетско ефикасни домови“, Општина Македонска Каменица ќе издвои рекордни средства на државно ниво, кои главно ќе бидат наменети за реконструкција на кровни конструкции и изградба на енергетски ефикасни фасади на станбените објекти на подрачјето на Општината.

Со реализацијата на овој проект, Општина Македонска Каменица продолжува со мерките за подобрување на условите за домување, намалување на потрошувачката на енергија и унапредување на квалитетот на живот на граѓаните.